Sunday, December 21, 2008

Tuberculosis (TB)

တီဘီ အဆုပ်နာ ကူးစက် ရောဂါ



(ဘလော့ခ်) တွေမှာ စာဝင်ရေးမိတာ မကြာသေးဘူး။ သူများတွေတော့ (ဘလော့ခ်)ကို ဘယ်လိုသဘောထားလေသလဲတာ့ မပြောတတ်ဘူး။ ကိုယ့်ဖါသာ ထင်တာလေးပြောရရင် ကူးစက်ရောဂါဘဲဗျ။ နောက်ပြီး ဆေးစွဲသလိုလဲ စွဲတတ်သေးတယ်။ အဟုတ်ပါ၊ ဆရာဝန်ဆိုတာ လူမြင်ရင် လူနာ ထင်နေတတ်လို့ ပြောတာ မဟုတ်ဘူးနော်။

ကျွန်တော် အခုလောကထဲ ရောက်လာချိန်မှာ ကွန်ပြူတာ ဆိုတာ ပေါ်မလို့ ရှိသေးတယ်။ စပြီး ကိုင်ဖူးချိန်မှာ (မော်နီတာ) တွေက အဖြူ-အမဲ။ ၂၈၆-၃၈၆ ဆိုတဲ့ခေတ်။ သင်ပြန်တော့ (ဒေါ့စ်) ကနေ စရတာ။ (၀င်းဒိုး)က မပေါ်သေးဘူးလေ။ နောက်လူတွေ သိမှာ မဟုတ်ဖူး။ အဲလိုရေးတာ ကြွားချင်လို့ “နောက်လူတွေ ငါတို့လောက်သိရှာမှာ မဟုတ်ဖူး”လို့ ဆိုချင်တာ မဟုတ်ပါကြောင်း အလျင်စလို တောင်းပန် ပါရစေ။ လူဟောင်းတွေက ပညာတွင်း နက်ခဲ့သဗျ။ နောက်လူတွေက ခူးပြီး-ခတ်ပြီး အသင့် စားသုံး နိုင် လာကြတာ ဓမ္မတာပါ။ အခု လူတွေကလည်း နောက်လူ တွေကို အဲလို ပြန်ပြောကြ ဦးမှာနော။

ကျွန်တော့် လုပ်ဖေါ်ကိုင်ဖက် တယောက်ရှိတယ်။ သူက နယ်စပ်မှာ အကြာကြီး နေခဲ့ပြီးမှ မြို့တက်လာတာ။ ကွန်ပြူတာလို ပစ္စည်းကိုလည်း တော်တော်နဲ့မထိဘူး။ ထိမဲ့ ထိတော့လည်း အခု သူက(ဘလော့ခ်) ဆရာ ဖြစ်နေပြီ။ ကိုယ့်ဖါသာလည်း ဖွင့်ထား၊ သူများ ကိုလည်း လိုက်သင်ပေး နေရပြီ။ စွဲသလား မမေးနဲ့။ နေ့- ည (ဘလော့ခ်)ဖတ်-ရေး၊ မှေးချိန်၊ တွေးချိန်၊ စားချိန်၊ အဲ့့ သောက်ချိန် လောက်ပဲ ဘဲနား ပုံရတယ်။ သူစွဲပြီး သိပ်မကြာပါဘူး၊ ကျွန်တော့်ကို ကူးပါ လေရောဗျို့။



ဘာနဲ့တူလဲ သိလား၊ (တီဘီ) လိုဘဲ အနားက ခြောက်ပေ အတွင်း ရှိသူမှန်သမျှ လူကြီး - ကလေး အခမဲ့ ဝေပေး နေတာမျိုး။ ကျွန်တော့် အနီးအနား မှာ နောက်တယောက် ကြတော့ သူ့ဖါသူ တတ်နေပြီး၊ သူများကို ပြောပြ - သင်ပေးလေ့ မရှိဘူး။ တီဘီ မှာလည်း အဲလို အမျိုးအစား လည်း ရှိတာကိုး။ သူများကို ကူးတတ်တာနဲ့ သူ့ဖါသာသူ ရောဂါ ခံနေရတာ နှစ်မျိုး။ သလိပ်စစ်လို့ ပိုးတွေ့သူနဲ့ ပိုးမတွေ့သူ ဆိုတဲ့ နှစ်မျိုးပေါ့။ Positive and Negative ခေါ်သလို Open Case and Close Case လို့လဲ ခေါ်ကြပါတယ်။

အဲဒီ ရောဂါက ဆိုးလို့ တကမ္ဘာလုံး နှိမ်နင်းရေးတွေ လုပ်နေကြတာ ကြာပါပြီ။ ဆိုးတယ် ပြောတာက ကူးလို့၊ အဖြစ်များလို့၊ သေစေ လို့ပါ။ ပိုဆိုးတယ် လို့ပြောနိုင်ပြန်ပြီဗျ။ အခုထိ ခေါင်းထောင်ဆဲ၊ ဘာလို့လဲ ဆိုတော့ ဖြစ်ဆဲ၊ ကူးဆဲ၊ သတ်ဆဲ ဖြစ်နေ လို့ပါ။ ခေါင်းမာဆဲ လည်း ဖြစ်သေးတယ်။ ကုနေကြဆေးကို မမှုတော့၊ မဖြုံတော့လို့ပါ။ ကျွန်တော်နေတဲ့ တိုင်းပြည်မှာ ရောက်နေကြတဲ့ ဒုက္ခသည် တွေထဲမှာ အဲလို ဆေးတွေ ပြီးတဲ့ ရောဂါသည်တွေ ရှိနေတယ်။

ကျွန်တော့် ဆေးခန်းလေးကို လာပြ သူတွေ ထဲမှာလဲ (တီဘီ) ရောဂါသည် အရေအတွက် တိုးတိုး လာတယ်။ တချို့ဆို မကြာခင်ကမှ တိုင်းပြည်ကနေ ပြေးလာရပြီး (တီဘီ) ဆေးပါတ် မစေ့သေးသူ ကလေး - လူကြီးတွေ ပါတယ်။ တချိန်ကဆိုရင် လူတယောက် ပိန်ခြောက်ခြောက် ဖြစ်နေ၊ ချောင်းလေး ဆိုးနေရင် (တီဘီ) ကို သံသယ ရှိခဲ့တယ်။ တကယ်တော့ မဟုတ်ပါ။ လူကောင်ကြီးကြီး၊ ဆေးလိပ် မသောက်သူတွေ အကြောင်း တခုခုကြောင့် ဆေးစစ်လိုက်မှ အဆုပ်ထဲ ရေ၀င်နေတာ တွေ့နိုင်တယ်။ ပေါင်ခြံတို့ လည်ပင်းတို့ အကြိတ်ပေါ်တာ သွားစမ်းမှ (တီဘီ) မှန်း သိရတယ်။ ဒါ့ကြောင့် မပေါ့ဘို့ အထူး လိုပါတယ်။

ကလေးတွေ ဖွါးပြီးတာနဲ့ ဘယ်ဘက် လက်မောင်း အပေါ်နေရာမှာ ထိုးပေးတာ (တီဘီ) ကာကွယ်ဆေးပေါ့။ (ဘီစီဂျီ) လို့ ခေါ်တာ။ သြကာသ လောကကြီးထဲ မရောက်ခင်၊ လူတွေနဲ့မထိမတွေ့ခင် ဦးအောင် လုပ်ပေးရတာပါ။ ဘာလို့လဲဆိုတော လူတောထဲမှာ ပိုးတွေ ရှိနေလို့၊ ပိုးနဲ့မတွေခင် ရောဂါပြီး စေမဲ့ သတ္တိတွေ ကလေး ကိုယ်မှာ ဖြစ်လာနှင့်အောင် ကာကွယ်ဆေးကို ထိုးပေး ရတာပါဘဲ။ အကြံ မကောင်း ပါလား။ အရင်ကတော့ ကလေးတွေ ကလေးမျိုးစုံနဲ့ကစားရ - အတူနေရ တော့မှာမို့ ကျောင်းမထားခင် တခါ ထပ်ထိုး ရတယ်။ အခု မလိုတော့ဘူး။ ဘာလို့လဲဆိုတော့ ကျောင်းမထားခင် ကတည်းက ကလေးတွေဟာ ပိုးရှိသူတွေနဲ့အတူ နေခဲ့ပြီး ဖြစ်တာမို့ မထူးတော့ တာပါ။

အခုဆိုရင် (တီဘီ) ရောဂါပြီး တယ်ဆိုတာကို သံသယ ရှိစရာတောင် ဖြစ်လာပြီ။ စောစောက ရေးသလို ဖြစ်ဆဲ၊ ကူးဆဲ၊ သတ်ဆဲ ဖြစ်နေလို့ပါ။ ကာကွယ်ဆေး ရဲ့ သဘောက ရောဂါပိုး ၀င်လာရင် ကိုယ်ထဲမှာ ဒီပိုးကိုတိုက်ဖျက်နိုင်စွမ်းတွေ အလိုလို ထွက်စေတာမို့ နောက်ထပ် ၀င်လာတဲ့ပိုးကိုပြန်ချဘို့ ကိုယ့်မှာ ခံနိုင်ရည် ရှိနေအောင် လုပ်ပေး ရတာပါ။ ပိုးတမျိုးမျိုးကို ရောဂါ အထိ မဖြစ်စေဘဲ သူ့ ပိုးအစွမ်း သတ္တိ ကလေးသာ ကျန်နေအောင် အဲဒီပိုးကို နှိပ်ကွပ်ပြီး၊ သေးသိမ်အောင် လုပ်ထားတာ လေးကို ကာကွယ်ဆေး အဖြစ် ပေးရ တာပါ။ BCG ထိုးလိုက်တဲ့ နေရာလေးမှာ အနာ လာဖြစ်တယ် မဟုတ်လား၊ အဲဒါ အဲဒီ နေရာလေးမှာ ကွက်ပြီး (တီဘီ) ဖြစ်နေတာဗျ။ ဒါ့ကြောင့် ကလေးက နည်းနည်း ကိုယ်ပူ လာတာပေါ့။ အဲလို ဖြစ်နေတုံး ကလေး ကိုယ်ထဲမှာ ဒီပိုးကို ပြန်ချမဲ့ သတ္တိတွေက သူ့ဖါသာ ထွက်လာ စေတော့ တယ်။ အဲ့့ နောက်တခါ (တီဘီ) ပိုးဝင်လာ လို့ကတော့ ဒီသတ္တိက ပြန်ချ နိုင်အောင် စီမံ ထားလိုက်တာ ပါဘဲဗျာ။ (အင်တီဘော်ဒီ) လို့မှတ်ရတာ အောက်တယ်၊ (အတွင်းအား) လို့မှတ်ဗျာ။

အတွင်းအား တွေနဲ့အစွမ်း ကောင်းလှတဲ့ ဇာတ်လိုက်တွေ ကြာတော့ ရိုးလာ သလိုဘဲ ပိုးဆိုတဲ့ အကောင် သေးမွှားမွှားလေးတွေက ကိုယ်ထက် ငယ်တော့ ကိုယ့်ထက်လည်တယ် ဆိုတာမျိုးလို အခု (တီဘီ) ခေါင်းထောင် နေဆဲပါ။ လေကနေ သယ်ပို့တဲ့ နည်းဖြစ်လို့ လေထု ပတ်ဝန်းကျင် သိပ်မကောင်းတဲ့ နေရာမျိုးမှာ ကူးစက်တာပါ။ ရုပ်ပတ်ဝန်းကျင် မကောင်းတာ မျိုးကလည်း ဆင်းရဲတာနဲ့တိုက်ရိုက် အချိုးကျတယ်။ ဆင်းရဲတော့ စီမံကိန်း လုပ်တာတွေက အညံ့စား - အပေါစားတွေဖြစ်တတ်တယ်။ စာရင်း ဇယားကို အောင်မြင် နေ ပါတယ်၊ တိုးတက် နေပါတယ်ဆိုပြီး လိမ်ပြတာ ကြိုက်တဲ့ အုပ်ချုပ်ရေး စနစ်မျိုးပါ ရှိနေပြန်ရင် သွားပြီပေါ့။ (တီဘီ) ပိုးက သင်္ချာ မတတ်လဲကူး၊ သင်္ချာမေဂျာ လဲ ကူးတာကိုး။

ကျွန်တော်တို့ အဲလို ပညာမျိုး သင်ရချိန်မှာ အဲလို ခေတ်မို့ “ကူးစက် ရောဂါတွေ သည် လူမှု စီးပွါးရေး မကောင်းပါသဖြင့် ပို၍ ဖြစ်ရသည်” ဆိုတဲ့ ကောက်ချက်ကို မချရ ဘူးတဲ့။ မခက်ဘူးလား။ နှိမ်နင်းရေးတွေ အောင်မြင် နေပါတယ် လို့ အစီရင်ခံစာ မှာ ပြရတော့ (တီဘီ) က ရီတာပေါ့။ အဲဒါ ကျန်းမာရေး ရာဇ၀တ်မှုဘဲ။ ဘာလို့လဲဆိုတော့ အခုထိလူတွေကို ဖြစ်ဆဲ၊ ကူးဆဲ၊ သတ်ဆဲဖြစ်နေလို့ပါ။ အခြေအမြစ်ကို မသတ် နိုင်သရွေ့ ရောဂါဆိုတာ မပျောက်ပါ။

တင့်ဆွေ


Related Posts :



6 comments:

khin oo may said...

ဆက်ရေးပါဦး ။အားပေးနေပါတယ်။

khin oo may said...

အင်ထရို ဘလော့ရှောုဂါ အကြောင်း က များနေတယ်။ ဒီလောက် မလိုဘူးလို့ထင်ပါတယ။် တီဘီကို အားပိုပေးပါ။ ဖတ်လို့ကောင်းပါတယ်။ ဆွဲဆောင်မှူရှိတယ်။ အစဘဲရှိသေးတယ်။ ဆက်တင်ပါဦး။ ကောင်းလိမ့်မယ် လို့ မျော်လင့်ပါတယ်။

Nge Naing said...

ဆရာ့ပို့စ်လေးက အတွေ့အကြုံလေးတွေ အတွေးအမြင်လေးတွေလည်း ပါတော့ သိပ်ကောင်းပါတယ်ဆရာ ဒါပေမယ့် ဆရာ တီဘီအကြောင်း ရေးတာက ကျွန်မတို့လို ဘလော့ဂ်စွဲတဲ့သူတွေအကြောင်းလည်း ပါနေတော့ Agenda နည်းနည်း ရောနေတာ တခုပါပဲ။ ဘလော့ဂ်စွဲတာနဲ့ တီဘီစွဲတာနဲ့တော့ ဘယ်အနည်းနဲ့မှ မတူနိုင်ဘူးဆရာ။ တီဘီစွဲတာက အန္ဓရယ်ဖြစ်ပေမယ့် ဘလော့စွဲတာက စိတ်ရဲ့ အပန်းဖြေအနားယူရာ လည်းဖြစ်တယ် ဗဟုသုတ မျှဝေရာလည်း ရောက်လို့ပါ။ ဆရာ့ပို့စ်မှာ Antibody ကို အတွင်းအားလို့ မြန်မာလို ဝေါဟာရ ယူထားတာ သိပ်ကောင်းပါတယ်။ ကျွန်မမှာ အင်္ဂလိပ်မြန်မာ ဆေးအဘိဓါန် ကောင်းကောင်းမရှိလို့ ပြီးတော့ ကျန်းမာရေးနဲ့ ပတ်သက်တဲ့စာတွေကို မြန်မာလိုနဲ့ လေ့လာရတာလည်းနည်းလို့ တချို့ဝေါဟာရတွေအတွက် မြန်မာလို ရွေးရတာ သိပ်အခက်အခဲဖြစ်တယ်။ ကျွန်မပို့စ်တွေကို ဆရာဖတ်မိလို့ မြန်မာလို ဝေါဟာရတွေ သုံးထားတာ အဆင်မပြေဖြစ်နေရင်လည်း ထောက်ပြပေးလို့ ရပါတယ်ဆရာ။ ဆရာ့ပို့စ်အတွက် ကျေးဇူးတင်ပါတယ်။

DTS said...

အခုလိုထာက်ပြတာတွေက လက်တွေ့ကျပါတယ်။ ကျေးဇူးတင်တယ်ခင်ဗျ။ အမှန်ပြောရရင် ကျွန်တော်က ဘာအထူးမှမဟုတ်ဘူး။ ဘာသာရပ်တခုခုကို နက်နက်နဲနဲရေးတာက အထူးဆရာတွေမှ။
တောမှာဘဲကျခဲ့ရသူ ဆရာဝန်-ဆရာမအားလုံးဟာ အထွေထွေအထူးကုဆိုပြီး ကျွန်တော့်ဆေးခန်း(ဘလော့ခ်)မှာတောင် ကိုယ့်ကိုယ်ကိုအပါအ၀င် ဂုဏ်တင်မိလိုက်တယ်။

နောက်တချက်က ကျွန်တော့်ဘ၀ပေးအရ ဒုက္ခသည်ကိုဆေးကုပေးဘို့ ဒုက္ခသည်ထဲက လူငယ်တွေကို မွေးယူနေရတယ်။ သူတို့ကို ရတဲ့အချိန်ကလေးမယ်၊ သူတို့မှာရှိကြတဲ့ အခြေခံလေးတွေနဲ့ ကိုက်အောင် ဘယ်လို စာသင်ရမယ်ဆိုတာကို စူးစမ်းရင်နဲ့ စာတွေကို ဘာသာပြန်လိုက်၊ သင်ခန်းစာတွေပြင်လိုက်လုပ်နေရတာ။ အတော်စိတ်ဝင်စားစရာ ကောင်းကောင်းလာတယ်ဗျ။ သူများကိုသင်ပေးတိုင်း ကိုယ်လဲပညာရတာမျိုးပေါ့။

အရင်ဆေးကျောင်းမှာဆိုရင် ဘိုလိုဘဲ ဖတ်-မှတ်ရင် ရတာကိုး၊ အခုမဟုတ်ဘူး။ ကပြားကအဆင်အပြေဆုံး။ တယောက်ကရေးလိုက်သလို ဘာသာပြန်ရတာကလဲ ခေါင်းစားတယ်။ ခေါင်းပိုစားတာက ကျွန်တော့် သင်တန်းသူတွေက တိုင်းရင်းသားတွေချည်းဘဲ။ ဗမာစာမပြောနဲ့ ဗမာစကားတောင် ခက်ခဲကြတာကများတယ်။ ဒီတော့ တတ်စေချင်ရင် ဆီလျော်အောင်လုပ်ရတယ်။ အဘိဓာန်ချည်းအားကိုမရတာကို ဆိုချင်တာ။ ပါဠိစာလုံး နေရာတိုင်းမသုံးလေနဲ့။

နောက်ပြီး ကျန်းမာရေးပညာပေးဆိုတာ သူများတော့မသိဘူး အတော်မလွယ်ဘူးဗျ။ ပေးတဲ့လူကပေးတတ်ယုံနဲ့ အလုပ်မဖြစ်ဘူး။ ကျုပ်တို့ပညာပေးတလတကြိမ်လုပ်ပြီးပြီဆိုတဲ့ (ရီပို့တ်)တော့ရမှာပေါ့။ ဖြစ်ချင်တာကဘာလဲ။ နားထောင်တဲ့လူတွေ လိုက်နာပြီးသကာလ ရောဂါဘယ နည်းအောင်မဟုတ်လား။ လာတက်တဲလူတွေကလည်း (ကွန်မြူနတီ-ဆားဗစ်-ပရိုဘိုက်ဒါ)ကခေါ်လို့ အားနာပြီးလာသူတွေလဲပါတယ်လေ။ ဒီတော့ အပြောမှာ တလုံးရရ ထိအောင်မိအောင် လုပ်ယူရတယ်။ ရီစရာမောစရာလည်းညှပ်မှ။ သူတို့ဘာသာစကားလည်း ထမင်းစား-ရေသောက် ထည့်မှ။ ပြီးရင် ဆေးကုပေးမယ်ဆိုတာနဲ့ မျှားရသေးတယ်။ လက်တွေ့သင်ပေးရင်လည်း အဲလိုအဲလိုနည်းနာတွေ သုံးရသေးသဗျ။

ဒါ့ကြောင့် ကျွန်တော် (ဘလော့ခ်)မှာရေးနေတာ အထာသိပ်မကျလောက်ဘူးလို့သိနေတယ်။ ဘာဘဲဖြစ်ဖြစ် (တားဂက်)အုပ်စုမှန်မှ အကျိုးရှိမှာပေါ့။

Anonymous said...

ဆရာရေ အတွေ့ကြုံတူတွေမို့ ထပ်တူခံစားမိပါတယ်။ မှတ်ချက်တွေနှင့် မှတ်ချက်အပေါ် ဆရာ တုန့်ပြန်ထားတာတွေကို သဘောကျမိတယ်၊ ပညာရတာပေါ့။ လေးစားပါတယ်။

khin oo may said...

ရေးချင်သလိုရေးပါ။
ပြောတဲ့သူကလည်းပြောချင်သလိုပြောမှာဘဲ။ ရေးဖြစ်ဘို့ဘဲ လိုပါတယ်။