လူသို့ ကြက်ငှက်တုပ်ကွေးရောဂါ ကူးစက်မှု မဖြစ်ပွားအောင် ကာကွယ်ရေး
နှိုးဆော်ချက် (၁) နှင့် (၂)
နှိုးဆော်ချက် (၁) နှင့် (၂)
- ကြက်ငှက်တုပ်ကွေးရောဂါသည် မြန်မာနိုင်ငံအပါအ၀င် ကမ္ဘာ့နိုင်ငံပေါင်း ၅၀ ကျော်တွင် ဖြစ်ပွားလျက်ရှိပါသည်။ ဆောင်းခို ရေပျော်ငှက်များမှတဆင့် တစ်ပိုင်တစ်နိုင် မွေးမြူထားသော ကြက်၊ ဘဲ၊ ငှက်များ၊ စီးပွားဖြစ် မွေးမြူထားသော ကြက်၊ ဘဲ၊ ငှက်များသို့ ကူးစက်ပျံ့နှံ့ရုံသာမက ခို၊ ကျီးကန်း၊ စာကလေး၊ ကြက်တူရွေး စသည့် ငှက်များနှင့် ၀က်၊ ကြောင်၊ ကျား စသည့် တိရစ္ဆာန်များသို့ပါ ရောဂါကူးစက် သေဆုံးလျက်ရှိပါသည်။
- ထိုမှတစ်ဆင့် ကြက်ငှက်တုပ်ကွေးရောဂါ လူသို့ကူးစက်မှုကြောင့် နိုင်ငံ ၁၂ နိုင်ငံတွင် ရောဂါဖြစ်ပွားခြင်း၊ သေဆုံးခြင်းများ ဖြစ်ပေါ်လျက် ရှိပါသည်။ ရောဂါဖြစ်ပွားလျှင်လည်း သေဆုံးမှု ၆၀ ရာခိုင်နှုန်းခန့် ရှိပါသည်။ ရောဂါဖြစ်ပွားနေသော ကြက်၊ ဘဲ၊ ငှက်များ၊ ရောဂါဖြစ်ပွားသေဆုံးသော ကြက်၊ ဘဲ၊ ငှက်များနှင့် ၄င်းတို့၏ အသား၊ ဥ၊ မစင်အညစ်အကြေးများနှင့် အခြား ငှက်ထွက်ပစ္စည်းများကို ထိတွေ့ ကိုင်တွယ်ရာမှ လူသို့ရောဂါ ကူးစက်ခံရခြင်း ဖြစ်ပါသည်။ ရောဂါကူးစက် သေဆုံးသူများတွင် ကလေးများနှင့် ကျန်းမာသော လူငယ်၊ လူရွယ်အများစုဖြစ်ပါသည်။
- သို့ဖြစ်ပါ၍ ပြည်သူများသို့ ကြက်ငှက်တုပ်ကွေးရောဂါ ကူးစက်ပြန့်ပွားမှု မရှိအောင် ကာကွယ်ရေးအတွက် အောက်ပါအချက်များကို လိုက်နာဆောင်ရွက်ကြပါရန် နှိုးဆော်အပ်ပါသည်။
- သို့ဖြစ်ပါ၍ ပြည်သူများသို့ ကြက်ဘဲငှက်များကို ကိုင်တွယ်ချက်ပြုတ်စားသုံးသူများသည် ကြက်ငှက်တုပ်ကွေးရောဂါ ကူးစက်မှုမှ ကာကွယ်ရန်အတွက် အောက်ပါအချက်များကို လိုက်နာဆောင်ရွက်ကြပါရန် နှိုးဆော်အပ်ပါသည်။
(က) ရောဂါကြောင့် သေဆုံးသော ကြက်၊ ဘဲ၊ ငှက်များနှင့် အကြောင်းမသိဘဲ သေဆုံးနေသေ ကြက်၊ ဘဲ၊ ငှက်များကို စားသုံးခြင်းမှ ရှောင်ကြဉ်ရန်၊
(ခ) တောငှက်များနှင့် ဆောင်းခိုရေပျော်ငှက်များကို စားသုံးခြင်းမှ ရှောင်ကြဉ်ရန်၊
(ဂ) ကြက်၊ ဘဲ၊ ငှက်တို့၏ အသား၊ သွေးနှင့် ဥများကို သေချာစွာ ကျက်အောင် ချက်ပြုတ်ပြီးမှ စားသုံးရန်၊
(ဃ) ကြက်၊ ဘဲ၊ ငှက်တို့၏ အသားနှင့် ဥများကို အစိမ်းစားခြင်း၊ မကျက်တကျက် ချက်ပြုတ်စားခြင်းတို့မှ ရှောင်ကြဉ်ရန်၊ (ချက်ပြုတ်ရာတွင် အသားနှင့် ဥအတွင်း အပူချိန် ၇၀ ဒီဂရီ စင်တီဂရိတ်ရောက်မှ ပိုးသေပါသည်။)
(င) ချက်ပြုတ်ပြီး အသားများကို အချိန်ကြာမြင့်စွာ ထားသို၍ စားသုံးခြင်းမှ ရှောင်ကြဉ်ရန်၊
(စ) ကြက်၊ ဘဲ၊ ငှက် အသားစိမ်းများနှင့် ဥများကို ဟင်းသီးဟင်းရွက်များနှင့် ရော၍ သယ်ဆောင်ခြင်း၊ ထားသိုခြင်းမပြုရန်၊
(ဆ) ကြက်၊ ဘဲ၊ ငှက် အသားစိမ်းများကို ချက်ပြီးဟင်းလျာများနှင့် အတူတကွ သိမ်းဆည်းခြင်း မပြုရန်၊
(ဇ) စဉ်းတီတုံးနှင့် ဓားကို အသုံးပြုရာတွင် ဟင်းသီးဟင်းရွက်များကို ပထမ လှီးပြီးမှသာ အသားများ ခုတ်ထစ်ရန်အတွက် အသုံးပြုရန်၊
(ဈ) အသားများကို ခုတ်ထစ်ရာတွင် သုံးသော စဉ်းတီတုံး၊ ဓားနှင့် အသားစိမ်းထည့်သော အိုး၊ ခွက်၊ ပန်းကန်တို့ကို ဆပ်ပြာနှင့် သန့်ရှင်းသောရေဖြင့် စင်ကြယ်စွာ ဆေးကြောရန်၊
(ည) အသားများကို ကိုင်တွယ်ခုတ်ထစ်ပြီးလျှင် လက်ကို ဆပ်ပြာနှင့် သန့်ရှင်းသောရေဖြင့် သေချာစွာ စင်ကြယ်အောင် ဆေးကြောရန်၊
(ဋ) အသားများကို ခုတ်ထစ်ရာမှ ထွက်လာသော ဘေးထွက်ပစ္စည်းများတွင် ရောဂါပိုး ပါရှိနိုင်သဖြင့် လူ၊ အိမ်မွေး သတ္တ၀ါများနှင့် ငှက်များသို့ ကူးစက်မှု မရှိစေရေးအတွက် စနစ်တကျ စွန့်ပစ်ရန်၊
(ဌ) မသန့်ရှင်းသောရေတွင် ရောဂါပိုးများ ပါရှိနေသဖြင့် အစားအစာ ချက်ပြုတ်ဆေးကြောရာတွင် သန့်ရှင်းသောရေကိုသာ အသုံးပြုရန်။
(က) ကြက်၊ ဘဲ၊ ငှက်၊ ၀က်များကို ရောနှော မွေးမြူခြင်းမှ ရှောင်ကြဉ်ရန်၊
(ခ) မိမိတို့ အိမ်အတွင်း (သို့မဟုတ်) အိမ်အောက်တွင် ကြက်၊ ဘဲ၊ ငှက်များ မွေးမြူခြင်းမှ ရှောင်ကြဉ်ရန်၊
(ဂ) ကြက်၊ ဘဲ၊ ငှက် မွေးမြူသူများသည် မွေးမြူရေးနှင့် ရေလုပ်ငန်း ၀န်ကြီးဌာနက ထုတ်ပြန်ထားသော ဇီဝလုံခြုံမှု နည်းစနစ်နှင့်အညီ ဆောင်ရွက်ရန်၊
(ဃ) လူအများ နေထိုင်ရာနှင့် ကြက်၊ ဘဲ၊ ငှက်မွေးမြူရာ နေရာများသို့ တောရိုင်းငှက်များ၊ ခို၊ ကျီးကန်း၊ စာကလေးများ မလာရောက်စေရန်အတွက် ခိုစာကျွေးခြင်း၊ စပါးနှံအတွဲချိတ်ခြင်း၊ အစားအစာကျွေးခြင်းကို ရှောင်ကြဉ်ရန်၊
(င) အထူးသဖြင့် ကလေးများကို ကြက်၊ ဘဲ၊ ငှက်များနှင့် ထိတွေ့ ကိုင်တွယ်ခြင်း မပြုလုပ်စေရန်၊
(စ) ရောဂါပိုးများသည် ရေထဲတွင် ကြာရှည်စွာ အသက်ရှင်သန်နိုင်သဖြင့် ကလေးများအား ရေကန်များ၊ အထူးသဖြင့် ဘဲမွေးကန်များတွင် ရေကူးခြင်း၊ ဆော့ကစားခြင်းများ မပြုလုပ်စေရန်၊
(ဆ) ကြက်ငှက် အရှင်၊ အသေ၊ အသား၊ သွေး၊ ဥ၊ အရိအရွဲနှင့် မွေးများတွင် ရောဂါပိုး ပါရှိနိုင်သဖြင့် ကိုင်တွယ် ဆောင်ရွက်ပြီးလျှင်ပြီးချင်း လက်များကို ဆပ်ပြာနှင့် သန့်ရှင်းသောရေဖြင့် စင်ကြယ်စွာ ပွတ်တိုက်ဆေးကြောရန်၊
(ဇ) ကြက်၊ ဘဲ၊ ငှက်များ၏ မစင်တွင် ရောဂါပိုး အမြောက်အမြား ပါရှိသောကြောင့် ကြက်၊ ဘဲ၊ ငှက်များ၏ မစင်ကို လက်ဖြင့် ထိတွေ့ကိုင်တွယ်ခြင်းမှ ရှောင်ကြဉ်ရန်နှင့် အကာအကွယ်ပစ္စည်း သုံး၍ စနစ်တကျ စွန့်ပစ်ရန်၊
(ဈ) ရောဂါရနေသော (သို့မဟုတ်) သေဆုံးနေသော ကြက်၊ ဘဲ၊ ငှက်များကို တွေ့ရှိပါက ရောဂါ မကူးစက်စေရန် လက်အိတ်စွပ်ခြင်း၊ နှာခေါင်းစည်းတပ်ခြင်း၊ ရင်ကာခါးစည်း (Apron) ၀တ်ဆင်ခြင်း အစရှိသော အကာအကွယ်ပစ္စည်းများ အသုံးပြုပြီးမှသာ ကိုင်တွယ်ခြင်း၊ မြှပ်နှံခြင်း၊ ဖျက်ဆီးခြင်း၊ သက်ဆိုင်ရာသို့ပေးပို့ခြင်း ပြုလုပ်ရန်၊
(ည) ကြက်ငှက်တုပ်ကွေးရောဂါ ဖြစ်ပွားရာ ဒေသတွင် နေထိုင်သူများသည် ကြက်ခြံများ၊ ကြက်ဘဲဒိုင်များ၊ ကြက်ငှက်သတ်သော နေရာများသို့ သွားရောက်ခြင်း မပြုရန်၊
(ဋ) ကြက်ငှက်တုပ်ကွေးရောဂါ ဖြစ်ပွားရာဒေသတွင် နေထိုင်သူများနှင့် အဆိုပါဒေသသို့ သွားရောက်ခဲ့သူများ၌ နှာစေး၊ ချောင်းဆိုး၊ ဖျားနာ၊ တုပ်ကွေးရောဂါ ကဲ့သို့သော လက္ခဏာများ ပေါ်ပေါက်လာလျှင် နီးစပ်ရာ ကျန်းမာရေး ဌာနသို့ အမြန်ဆုံးသွားရောက် ကုသမှုခံယူရန်။
လက်ကို သန့်ရှင်းအောင် ဆေးကြောခြင်းသည် ကူးစက်ရောဂါများ မဖြစ်ပွားအောင် ကာကွယ်ခြင်းဖြစ်သည်။
ကျန်းမာရေးဝန်ကြီးဌာန
(၂၀၀၇ ဒီဇင်ဘာလ ၁၈-ရက် နှင့် ၂၀-ရက် နေ့ထုတ် မြန်မာ့အလင်းသတင်းစာများမှ)
Posts
1 comment:
It wuld be nice if you could also add the English translation of the content in this blog, so that the rest of the world could benefit from your experiances.
Thanks.
birdflubreakingnews@yahoo.com
www.birdflubreakingnews.com
Post a Comment