Monday, May 18, 2009

10 Essential Public Health Services


ပြည်သူ့ကျန်းမာရေး လုပ်ငန်းလို့ ပြောတဲ့အခါ အဲဒါက ဘာတွေကို ဆောင်ရွက်ပေးနေတာလဲလို့ မေးစရာ ရှိလာပါတယ်။
နိုင်ငံ တစ်နိုင်ငံချင်း ပေါ်မှာ မူတည်လို့ ပြည်သူ့ကျန်းမာရေးနဲ့ ပတ်သက်လို့ နားလည်ထားမှုတွေ၊ ဆောင်ရွက်နေမှုတွေ ကွာခြားနေပါလိမ့်မယ်။
အမေရိကန် နိုင်ငံကတော့ ပြည်သူ့ ကျန်းမာရေးမှာ အရေးပါတဲ့ လုပ်ငန်း တာဝန် ဆယ်ခု ရှိတယ်လို့ သတ်မှတ်ထားပါတယ်။
အဲဒါတွေက -

(၁) စောင့်ကြပ် ကြည့်ရှုခြင်း
ပြည်သူတွေရဲ့ ကျန်းမာရေး အခြေအနေ၊ ရောဂါ ပြန့်ပွားမှု အခြေအနေ၊ ကျန်းမာရေး စောင့်ရှောက်မှု ပေးနေတဲ့ နေရာတွေရဲ့ လုပ်ငန်းဆောင်ရွက်မှု အဲဒါတွေကို အမြဲတမ်း စောင့်ကြပ်ကြည့်ရှုနေဖို့ လိုပါတယ်။ အဲဒါမှ ဘယ်နေရာတွေမှာ ပြဿနာတွေ ရှိနေသလဲဆိုတာကို ရှာဖွေဖော်ထုတ်ပြီး ဖြေရှင်းနိုင်စွမ်း ရှိမှာပါ။
(၂) ကျန်းမာရေး ပြဿနာများကို ရှာဖွေ ဖော်ထုတ်ခြင်း၊ စုံစမ်း စစ်ဆေးခြင်း
ပြည်သူတွေ ကြားထဲမှာ ဘာကျန်းမာရေး ပြဿနာတွေ ရှိနေသလဲ၊ ပြည်သူတွေ ဘယ်လို ကျန်းမာရေး ဆိုင်ရာ အန္တရာယ်တွေနဲ့ ကြုံတွေ့နေရသလဲ ဆိုတာတွေကို ရှာဖွေ ဖော်ထုတ်ဖို့၊ စုံစမ်း စစ်ဆေးဖို့ တွေက ပြည်သူ့ ကျန်းမာရေး လုပ်ငန်းရဲ့ အရေးပါတဲ့ ဆောင်ရွက်ချက်တွေထဲက တစ်ခုပါ။
(၃) ပြည်သူ လူထုကို ကျန်းမာရေးနဲ့ ပတ်သက်သော သတင်းအချက်အလက်များကို အသိပေးခြင်း၊ ပညာပေးခြင်း
ပြည်သူလူထုက ကျန်းမာရေးနဲ့ ပတ်သက်တဲ့ ပြဿနာတွေကို ကိုယ်တိုင် သိနားလည်ခွင့်ရတဲ့ အခါ သူတို့မှာ မိမိရဲ့ ကျန်းမာရေး အတွက် မိမိ ကိုယ်တိုင် ပါဝင်ဆောင်ရွက်နိုင်တဲ့ စွမ်းအင်တွေ ပိုများလာပါတယ်။ မိမိ ကိုယ်တိုင်ရဲ့ ကျန်းမာရေး၊ မိမိ မိသားစုနဲ့ မိမိ ပတ်ဝန်းကျင်ရဲ့ ကျန်းမာရေး ပြဿနာတွေကို ဖြေရှင်းဖို့ ကိစ္စတွေမှာ ပါဝင် ဆုံးဖြတ်နိုင်စွမ်းတွေလဲ ပိုမို များပြားလာပါတယ်။
(၄) ပြည်သူလူထုကို စည်းရုံး လှုံ့ဆော်ခြင်း
ပြည်သူလူထုတွေ ကျန်းမာရေး ကိစ္စရပ်တွေ ဆောင်ရွက်ရာမှာ ပါဝင်လာစေရေးအတွက် ကျန်းမာရေး ဆိုင်ရာ စီမံချက်တွေကို ပြည်သူလူထုနဲ့ အတူတကွ လက်တွဲ ဆောင်ရွက်ခြင်း(ဥပမာ- လူထုထဲမှာ ရှိနှင့်ပြီးသား ဖြစ်တဲ့ သာရေးနာရေး အဖွဲ့တွေနဲ့ ပူးပေါင်းဆောင်ရွက်ခြင်း)၊ ကျန်းမာရေး ပြဿနာတွေကို အတူတကွ ရှာဖွေဖော်ထုတ်ကာ အတူတူ ဖြေရှင်းကြခြင်း။
(၅) ကျန်းမာရေး ဆိုင်ရာ မူဝါဒများ ပေါ်ပေါက်လာအောင် ဆောင်ရွက်ပေးခြင်းနဲ့ ကျန်းမာရေး လုပ်ငန်း အစီအစဉ်များ ချမှတ်ရေးဆွဲ ခြင်း
- ပုဂ္ဂလိက အဖွဲ့အစည်းတွေနဲ့ ရပ်ရွာလူထု အဖွဲ့အစည်းတွေမှ ကျန်းမာရေးအတွက် ဆောင်ရွက်နေမှုတွေကို အဲဒီမူဝါဒတွေနဲ့ ပံ့ပိုး ကူညီပေးနိုင်ပါတယ်။
(၆) ပြည်သူလူထုရဲ့ ကျန်းမာရေး ထိခိုက်မှု မရှိစေရန် ကာကွယ် စောင့်ရှောက်မှုပေးနေတဲ့ ဥပဒေတွေ ကို လက်တွေ့ကျင့်သုံး ဆောင်ရွက်ခြင်း၊ ( ဥပမာ - တားမြစ် ဆိုးဆေးပါတဲ့ အစားအစာတွေကို ဖြန့်ဖြူးရောင်းချခွင့် ပိတ်ပင်တာ)
(၇) ကျန်းမာရေး စောင့်ရှောက်မှု ခံယူဖို့ လိုအပ်နေတဲ့ သူတွေကို လိုအပ်တဲ့ ကျန်းမာရေး ၀န်ဆောင်မှု ပေးနိုင်သည့် နေရာများနဲ့ ဆက်သွယ်ပေးပြီး လိုအပ်သည့် ကျန်းမာရေး စောင့်ရှောက်မှုတွေ အမှန်တကယ် ရရှိစေဖို့ အာမခံ ဆောင်ရွက်ပေးခြင်း။
(၈) အရည်အချင်း ပြည့်ဝတဲ့ ပြည်သူ့ ကျန်းမာရေးဝန်ထမ်းတွေနဲ့ ပုဂ္ဂလိက ကျန်းမာရေး ၀န်ထမ်းတွေ ဖြစ်စေရန် အာမခံ ဆောင်ရွက်ပေးခြင်း။ ( ဥပမာ - အရည်အချင်း သတ်မှတ်ချက်ပြည့်မီမှ လိုင်စင် ထုတ်ပေးတာ)
(၉) ပြည်သူ့ကျန်းမာရေး ၀န်ဆောင်မှု လုပ်ငန်းတွေနဲ့ ပုဂ္ဂလိက ကျန်းမာရေး ၀န်ဆောင်မှု လုပ်ငန်းများတွေရဲ့ ထိရောက်မှု၊ လက်လှမ်းမီမှု၊ အရည်အသွေးတွေကို သတ်မှတ်ထားတဲ့ စံနှုန်းနဲ့ တိုင်းတာပြီး အကဲဖြတ်ခြင်း။
(၁၀) ပြည်သူလူထု ကြုံတွေ့ခံစားနေရတဲ့ ကျန်းမာရေး ပြဿနာတွေကို ဖြေရှင်းနိုင်မယ့် နည်းလမ်းသစ်တွေ၊ အမြင်သစ်တွေ ပေါ်ထွက်လာစေဖို့ အတွက် သုတေသန လုပ်ငန်းတွေကို ဆောင်ရွက်ခြင်းတို့ ဖြစ်ပါတယ်။
(စာကိုး - 10 Essential Public Health Services ( CDC) )


Related Posts :



No comments: